س: كيف يمكن تحديد الأعطال في دوائر التحكم؟
.حل أسئلة الهندسة الكهربائية
مرحباً بكم متابعينا الأعزاء طلاب وطالبات العلم في موقعنا النورس العربي منبع المعلومات والحلول الذي يقدم لكم أفضل الأسئله بإجابتها الصحيحه من شتى المجالات التعلمية من مقرر المناهج التعليمية والثقافية ويسعدنا أن نقدم لكم حل السؤال الذي يقول........ كيف يمكن تحديد الأعطال في دوائر التحكم
.الاجابة
.كيف يمكن تحديد الأعطال في دوائر التحكم
تحديد الأعطال في لوحات الكنترول
من اكتر الحاجات الي بتقابلها كمهندس صيانة هي الاعطال
ودورك كمهندس صيانة انك تصلح العطل وانك تصلح العطل بسرعة
في شركات كتير بتخلي مكافآت مهندسين الصيانة على ال down time فكل ما كان ال down time قليل كل ما المكافأة زادت.
قبل متضرب مفتاح في اللوحة في شوية حاجات على السريع لازم تعملها
1- نظرة سريعة على اللوحة من الداخل لو في مفتاح ساقط او اوفرلود فاصل او فيوز محروق ومن الخارج لو في مفتاح طواري مضروب او في فازة ساقطة
2- لو المكنة فيها شاشة ففي الغالب حيكون في صفحة للاعطال وال alarm حتلاقي فيها توصيف العطل والسبب وممكن يقولك الحل كمان ادخل وشوف المشكلة فين وبجانب الشاشة حتلاقي لمبات بيان لكل عطل (صورة رقم 2)
3- لو شميت ريحة حاجة محروقة حاول توصل لها بسرعة وتكشف عليها (صورة رقم 3)
4- قيس الجهد الي داخل اللوحة قبل المفتاح العمومي
- بالنسبة لاول نقطة لو لقيت مفتاح ساقط او اي حاجة فاصلة مترفعاهش لانك مش عارف لسه القاطع ده بتاع ايه وفي حالة انك عارف المفتاح ده بتاع الموتور الفلاني مترفعوش برضو وكمل قراءة
- يبدأ الكشف عن العطل من المصدر الى الحمل في مساري الكنترول والباور
- بنسبة 80 % أعطال الماكينات ميكانيكا وليس كهربا حتى أعطال الكهربا نفسها سببها ميكانيكا الجهاز الكهربي زي ان الكونتاكتور يكون ملقط باستمرار لضعف السوستة الداخلية أو ان الحرارة اثرت على اي قطعة كهربية
- في نقطة مفصلية مهمة جدا عشان تعرف العطل فين وهي ان الكنترولر زي ال plc مثلا هو السبب ولا حاجة تانية هي السبب لان لو ال plc مش مخرج اشارة فدي سكة ولو ال plc مخرج اشارة بس الحمل مبيشتغلش دي سكة تانية
- من أسرع الطرق للكشف عن العطل في حالة ما اذا كان السبب هو ال plc هو الدخول مباشرة (online)على ال plc ومعرفة السبب بس دا في حالة ان معاك ال wiring فانت عارف كل اوبت بيشغل ايه وكل دخل جاي منين وعارف كمان دلالات ال markers
حتلاقي شروط كتير عشان ال output يشتغل معظمها حمايات في شكل markers فبلاش تستنصح وتشيلها. شوف كل marker دلالته ايه وايه الي معطله او ايه الي مشغله حتلاقي في الاخر حساس قاري غلط او قيمة متسجلة غلط او مفتاح طواري مضروب او ليميت معلق الي هي الاعطال المتكررة بتاعتنا
مرة من المرات لقيت ان في بلف شغال علطول رغم ان انا كاتب ان البلف دا مبيشتغلش الا لما يكون الفوتوسيل الي قبله شايف حاجة قدامه كلمت المهندس المسئول يراجع الفوتوسيل لقى ان الفوتوسيل فعلا فيه مشكلة وقاري باستمرار
- بما ان معظم مكونات لوحة الكنترول ديجيتال فسهل انك تكشف على كل جهاز فيها انك تعمل test في الحالتين energized and not energized فعلى سبيل المثال لو في plc بيشغل ريلي بيشغل كونتاكتور بيشغل موتور فأول حاجة اتاكد منها ان plc بيخرج اشارة وانها بتوصل للريلي سليمة وان لريلي لما تجيله الاشارة يلقط ويخرج الاشارة وان الاشارة توصل الكنتاكتور سليمة
- عشان اتاكد من الخرج لازم اقيس بنفسي جهد الخرج ومش كفاية اني اشوف الليد الخاصة بالخرج منورة لأن ممكن يكون الخرج شغال software بس محروقhardware سواء short circuit فشغال علطول أو open circuit فمبيخرجش اشارة خالص
- ممكن يكون الخرج شغال في ال software ولكن emergency bit شغالة فمعطلة كل خرج في ال hardware
- بعد ما اتاكدت ان الplc تمام مخرج اشارة لازم اتاكد ان الاشارة واصلة صح لل relay لأن وارد ان السلك الواصل من ال plc للريلي مقطوع أو انت واخد سلكة غلط لو الدايرة كبيرة ومش مرقمة
- الكلام ده حتطبقه مع الكونتاكتور ايضا فتتاكد ان الاشارة واصلة للكونتاكتور تمام وانه بيلقط لازم حتلاقي حاجة ساقطة في النص هي الي عاملة مشكلة
- طب الكونتاكتور بيلقط والموتور واقف ادخل على دايرة الباور وقيس جهد على الفازات من القاطع لان وارد ان الكونتاكتور بيلقط بس القاطع فاصل وتباعا من القاطع الى الكونتاكتور الى الاوفرلود الى الموتور لازم حاجة تلاقي فيها مشكلة. إما القاطع فاصل او الاوفرلود فاصل او كله تمام بس الكابل الواصل بين الموتور والاوفرلود فيه مشكلة
- لو الموتور بيفصل اوفرلود فمش ذكاء ان تزود امبير الاوفرلود راجع قياس الملفات وهات مهندس ميكانيكا يشوف الحمل فيه مشكلة ولا لا فوارد ان الموتور سليم بس البلي فيه مشكله او الجيربوكس فيه مشكلة او عمود الموتور فيه عوجة بتعمل احتكاك او الملفات نفسها فيها مشكلة فساعتها اما تلف الموتور او تجيب موتور بديل
- لو في مفتاح طواري وعليه لقمة بتعلق فممكن للحظات اللقمة نفصل وترجع تشتغل تاني بس المكنة حتقف ومترجعش تشتغل تاني عشان البرنامج الي عليها بيقول كده
- لو الحمل بيفصل شورت سيركت اول ما يقوم فمتحاولش تشغله تاني الا لما تكشف عليه. وابدا بعزل الحمل لوحده يعني تشغل الحمل لوحده مفيش حاجة تشتغل معاه لان مرة حصل معايا شخصيا ان موتور كسارة اول ما بيقوم يفصل شورت سيركت واتضح في الاخر ان لمبة البيان الي شغالة بالتوازي مع الموتور هي الي فيها المشكلة. سبب تاني يعمل شورت سريكت ان القاطع او الاوفرلود او الكنتاكتور متفحم وفي فازة ملمسة فازة تانية
- غير الشاشة على لوحة الكنترول وخصوصا في الكمبروسورات والشيلرات حتلاقي لمبات بيان لل alarms لمبة للاوفرلود ولمبة لحرارة الزيت لو زادت ولمبة لو حصل ان الفازات اتبدلت فكل دي بتساعدك توصل للمشكلة بسرعة في اعطال كتير بتسبب ان ال system كله يقف وتحلها بس ميرجعش يشتغل لانه مستني منك انك تعمل reset اما من الشاشة او عن طريق Pushbutton
- اللوحات الي عندك في المصنع وبالذات الكمبروسورات والشيلرات والغلايات حاول تعمل لها wiring لانك لما ترسمها حتفهمها وتعرف بسهولة المشكلة فين لو حصل اي مشكلة
- كمهندس صيانة لازم يكون عندك احتياطي جاهز من كل القطع الصغيرة الي بتبوظ بسرعة زي الريليهات والكونتاكتورات والمفاتيح والفيوزات والقواطع واحتياطي جاهز يعني يكون في مكتبك مش في المخازن. متستناش تطلب من المخازن او من المشتريات انهم يوفروهالك لازم تبقى سابق بخطوة
لو قابلت أعطال قبل كده وحليتها ممكن تشارك بتجربتك عشان الكل يستفيد
