ملخص مسلسل صراع العروش Game Of Thrones الموسم ( 1 ، 2 ، 3 ، 4 ، 5 ) مراجعة لعبة العروش ويكيبيديا
أحداث لعبة العروش في الموسم الأول والثاني والثالث والرابع والخامس صراع العروش باختصار ويكيبيديا
تقييم الموسم الأول ( 10 من 10 )
تقييم الموسم التاني ( 9 من 10 )
تقييم الموسم التالت ( 10 من 10 )
تقييم الموسم الرابع ( 10 من 10 )
تقييم الموسم الخامس ( 8 من 10 )
مراجعة مسلسل Game Of Thrones
الموسم ( 1 ، 2 ، 3 ، 4 ، 5 )
بتدور أحداث المسلسل في قارتين خياليتين هما ويستروس وإيسوس وبتتصارع في ويستروس سبع عائلات للسيطرة على العرش الحديدي للممالك السبعة وإيسوس فيها دينيريس والدوثراكي وبيزيد الصراع بين الممالك السبعة دول في ويستروس وفي نفس الوقت بتتعرض الممالك السبعة كلها لخطر بيهدد بقائهم من ناحية الشمال المتجمد الي كان مليان كائنات ومخلوقات خيالية هتهاجم الممالك السبعة دي من وقت للتاني بشكل مستمر علي مدار أحداث المسلسل .
"عندما تلعب لعبة العروش، إما أن تكسب أو تموت، لا يوجد اختيار وسط" سيرسي لانستر
مسلسل صراع العروش مبقاش مجرد مسلسل مميز وخلاص لكن ده تحول وبقي ظاهرة فنية عالمية وكان فيه قبله ظواهر عالمية فنية مقتبسة من روايات ليها جماهيرية وثقافة خاصة زي هاري بوتر أو سيد الخواتم ولكن المميز في صراع العروش انه بقي ظاهرة صاحبة قاعدة جماهيرية كبيرة جدا علي مستوي العالم .
فا في ناس بتفسر الشهرة العالمية لمسلسل صراع العروش تفسيرات مش منطقية وفي ناس وصفت المسلسل بأنه استثمار جنسي ناجح من شركة HBO كعادتها في تسويق وجمع الأموال من عروض الجنس وفي ناس وصفته أنه مسلسل ذكوري جي على قيمة الأنثى ولكن التفسيرات دي هيفضل جزء منها صحيح وجزء منها خاطئ .
وبكل تأكيد الجانب الجنسي كان موجود بشكل اوفر بالمسلسل و ده الي كانت HBO عايزة تستثمره وتجيب من وراه فلوس وعشان نكون صريحين فا جماهيرية مسلسل صراع العروش جزء من تكوينها كان بسبب المحتوى الجنسي وجزء من تكوينها كان بسبب الإنتاج الضخم ولكن كان في اسباب أعمق بكتير بأن المسلسل يكون ظاهرة شعبية كبيرة كده وعدم دراسة أسباب جماهيرية المسلسل بالنسبالي كانت تقليل في حق المسلسل لانه بقي تاريخ ودراسة في صناعة الدراما والروايات المثيرة في المستقبل .
وخليني اسألك سؤال تجاوبني عليه بالكومنتات بعد ما تنتهي من قراءة المراجعة وهو هل كنت هتحب مسلسل صراع العروش بنفس الدرجة لو كان اختفت منه كل العلاقات المحرمة المنتشرة في الاحداث؟ وخلي بالك إجابتك الصادقة هتحدد نسبة نجاح جورج مارتن أو لا .
المسلسل تم عرضه في المرة الأولى بالولايات المتحدة الأميركية في 17 ابريل سنة 2011 على شبكة HBO وبعدها بقي يتعرض في أكتر من 54 دولة حول العالم إضافة لدول الوطن العربي والمسلسل مقتبس من رواية صراع العروش المقتبسة من سلسلة روايات تلج ونار "A Song of Ice and Fire" من تأليف الكاتب الأمريكي جورج مارتن .
وتكلفة الموسم الواحد من المسلسل حوالي 60 مليون دولار يعني أكتر من 600 مليون جنية مصري و ده أكتر من تكلفة إنتاج كل المسلسلات المصرية في رمضان 2015 مجتمعة مع اعتبار أن الموسم الواحد من المسلسل 10 حلقات فقط مش 30 زي المسلسلات المصرية وصراع العروش هو تاني أضخم مسلسل من ناحية الإنتاج في تاريخ الدراما .
والمسلسل مليان تنانين وناس بتموت وترجع للحياة تاني وسحرة ومصطلحات خاصة بكل أسطورة جوا المسلسل ولكن مسلسل صراع العروش بالرغم من انه مليان مميزات إلا أنه افتقد لعنصر الأساطير نفسها ومكنش في أسطورة بالمسلسل تقوم عليها الاحداث الدرامية لكن ده كان الموضوع عبارة عن منظر بس زي ما شفنا مشهد من ذاكرة سيرسي لما قابلت ساحرة تنبأت بمصير عيالها ولكن ده كان في الجزء الخامس يعني بعد ما عرفنا مصير عيالها في المواسم الي فاتت .
في طفولة جورج مارتن مؤلف المسلسل كان بيقرأ رواية سيد الخواتم كأي طفل أمريكي وفي نهاية الجزء الأول لما مات جاندلف كان مارتن متأثر جدا بالنهاية دي واتأثر أكتر لما رجع جاندلف للحياة تاني في الجزء التاني وشاف ان دي حاجة مش مقنعة ولكنه اقتنع بعد كده أن العودة من الموت بتكون مؤقتة ولحسن الحظ الطفل الي اتأثر بموت جاندلف ده كان سبب في صنع تغيير في أسلوب السيناريو التقليدي و أول مرة نشوف البطل بيموت في مشهد عادي في الحلقة التاسعة من الموسم الأول .
لما اتقتل نيد ستارك بسهولة والمشاهدين كانوا فاكرين أن المشهد ده عادي وفاكرين ان الحلقة الي بعدها هيجي سهم يقع علي القاتل وهو بيقتل نيد ستارك ويعيش البطل عادي ده بطل المسلسل ياعم ولكن السهم مجاش ومات نيد ستارك بطل المسلسل كله والهدف من موت نيد ستارك مش مجرد استعراض بقتل البطل وخلاص لكن ده بيأكد عندك فكرة أن العنصر الرئيسي للأحداث والي انت فاكر أن المسلسل واقف عليه اهو اتقتل وانتهي دوره بالمسلسل .
الغريب في الموضوع أن سلسلة الكتب الي المسلسل مقتبس منها كان فيها عدد كبير من الأساطير والنظريات وللأسف تم حذف كل ده من أحداث المسلسل ومن ضمن الي اتحذف كان أسطورة أزور أهاي والي بتتكلم عن بطل هيتولد بعد غياب 5000 سنة عشان يحارب قوى الظلام وأنه لو اتهزم هيتدمر العالم كله معاه وكل الناس الي قرأت سلسلة الروايات طلعت تفسيرات وتوقعات لمين هو أزور أهاي والأغلبية شافته أنه جون سنو هو البطل المنقذ .
فا زي ما قلتلك إن غياب الأساطير في المسلسل كان سبب في غياب خط الدراما الرئيسي لان المسلسل بقاله خمس مواسم بيدور علي خط درامي رئيسي لكنه فشل مع موت أبطال المسلسل وتدمير الخطوط الدرامية واحد ورا التاني حتى لما ظهر خط درامي ممكن نبني عليه قضية زي الحرية والعبودية الي ظهرت مع ظهور ديناريس تارجيريان ولكن تم إهمال الخط الدرامي ده كمان وحسينا أن قصة ديناريس منفصلة خالص عن باقي أحداث المسلسل .
يعني محور الصراع المركزي والهدف الاساسي الي بيجري وراه كل الموجودين بالمسلسل هو العرش الحديدي الي اتقتل عشانه روبرت براثيون وبدأ الكل ياكل في بعضه عشان بس يطلع واحد منهم ياخد شرف الجلوس على العرش الحديدي فا بقي عندنا حوالي خمس ملوك كل واحد منهم وراه جيش بيساعده عشان يقعد على العرش الحديدي .
ولكن عشان يزود الحماس والاثارة عند المشاهدين وتزيد نسب المشاهدة راح ضحي بالخط الدرامي الرئيسي بتاع العرش الحديدي كمان وكل الي حاول من بداية المسلسل انه يقعد علي العرش الحديدي تم قتله وهتلاحظ أن كل موسم في ملك واحد بيموت لحد ما وصلنا للموسم الخامس هنلاقي أن العرش الحديدي مبقاش له أهمية وعارفة ان موضوع موت الملوك ده زود اثارة المسلسل بس اضراره كانت اكتر بكتير واثرت علي 70% من احداث المسلسل .
