تخصص الطب البشري في الأردن 2022 - 2023 كل ما يخص تخصص كلية الطب البشري ومعدلات القبول
تخصص: الطب البشري في الأردن
معدل قبول الطب البشري في الأردن 2022
شروط تخصص الطب البشري في الأردن
ملف تسجيلات الطب البشري في الأردن
نرحب بكم زوارنا الاعزاء على موقع النورس العربي منبع المعلومات والحلول الذي يقدم لكم أفضل المعلومات والحلول الثقافية عن اسالتكم التي تقدمونها ولكم الأن إجابة السؤال ألذي يقول..........................تخصص الطب البشري في الأردن 2022 - 2023 كل ما يخص تخصص كلية الطب البشري ومعدلات القبول
.وتكون اجابتة الصحية هي الأتي
الطب البشري
رح نحكيلكم كل المعلومات عنه، يعني من لما تفكر بدك تروح طب بشري لحد ما تتخرج مشان يكون الطريق واضح قدامك وتقدر تقرر هل تدخله أو لا بناء على ذلك إن شاء الله.
بالبداية في أسئلة لازم تسألها حالك قبل ما تقرر إنك بدك تدرس طب، من هاي الأسئلة:
١- أنا شو هدفي من الطب؟؟ ليش بدي هاد التخصص بالذات؟؟
٢- بناء على شو حطيت ببالي فكرة الطب، هل بسبب مسلسل خيالي عن الطب؟ ولا سألت طبيب؟ ولا نزلت ع المستشفى وشفت طبيعة العمل؟
٣- هل كان لنظرة المجتمع تأثير على تفكيري؟
يعني عشان يحكو الدكتور راح والدكتور اجا ولا أنا فكرت بشكل عقلاني تجاه التخصص وأخذت بعين الاعتبار إنه الناس ما رح يتعبوا معي وما رح يدرسوا معي وأنا الي رح أكون قاعد ع المكتب بنص الليل سهران ع الكتب لحالي وما رح يفيدني مدحهم؟!
٤-هل سألت عن طبيعة العمل بعد التخرج وإذا مناسبة الك أو لأ؟؟
٥- إذا كان السبب مادي بحت اسأل حالك واسأل أطباء تخرجوا وتعينوا هل صحيح إنه الطبيب من الطبقة المخملية ولا هو من الجماعة الي قاعدين ع خط الفقر؟!!
٦- هل أنا عندي المقومات الأخلاقية لحفظ أسرار المريض مستقبلًا والي تخليني أشوفه كأمانة مش كدنانير تتنفس؟ هل أنا من النوع الي رح أكون شايف حالي ع المريض ومعتبر حالي اشي كثير بس عشان حرف د الي قدام اسمي؟
٧-خلص مكفي أسئلة
الآن جاوبت ع الأسئلة وشفت والله إنه إجاباتي قادتني لأنه الطب مناسب الي مبدأيًا، فبدي أعرف وين ممكن أدرس الطب!!
الطب في الأردن يدرَّس في ٦ جامعات:
الجامعة الأردنية، جامعة مؤتة، الجامعة الهاشمية، جامعة البلقاء، جامعة العلوم والتكنولوجيا، وجامعة اليرموك.
معدل القبول:
أقل معدل قبول للتنافس سنة ٢٠٢٠،، 99.4
أقل معدل قبول للمـوازي سنة ٢٠٢٠ ،، 97.6
* مش بالضرورة يكون قبولكم نفس الاشي لأنه يعتمد على معدلات سنتكم.
عدد ساعات التخصص 256 ساعة، تقسَّم على 6 سنوات.
الرسوم:
التنافس: 45 دينار
الموازي: 175 دينار
الدولي:500 دولار
بدنا نحكيلكم شو رح تدرسوا خلال هاي ال 6 سنوات وكيف رح تتوزع ال 256 ساعة عليهم.
الطب ينقسم عنا لمرحلتين: المرحلة الأساسية والمرحلة السريرية.
المرحلة الأساسية هي عبارة عن أول ٣ سنوات، رح تكون كلها عبارة عن مواد نظرية بدون أي تطبيق عملي، يمكن تلبس لابكوت عشان اللاب بس ما في سماعة ومريض
سنة أولى مكونة من ٣ فصول، الفصل الأول رح يكون معكم مواد عامة ومشتركة مع تخصصات ثانية مثل بيو ١٠١ وفيزياء ١٠٥ وكيمياء ١٠١ و إحصاء ومهارت حاسوبية للكليات الطبية.
✨ مواد الفصل هاد كلها من خارج كلية الطب، وهو سهل فاستغلوه من البداية وجيبوا علامات عالية✨
الفصل الثاني رح تبلشوا بمواد الطب
رح يكون معكم مواد عامة وعبارة عن مقدمة للطب مثل الأناتومي والفسيولوجي والهستولوجي وال (مولوكيولار & سايتولوجي)، والأورغانيك"هاي المادة من كلية العلوم"
"بهاد الفصل رح تشوفوا جثة وتشوفوا العضلات والأعصاب وهاي الأشياء عليها"
الصيفي رح يكون خفيف لطيف فيه بس بيوكيم والباقي متطلبات..
هاد الفصل اتنفسوا فيه كويس عشان الي بعده كثير حلو
سنة ثانية فصل أول رح يكون معنا برضو مواد عامة ومقدمات وهي الباثو والفارما والمايكرو&أميون و ال Community والميتابولزم.
الفرج هو نظام السيستمات، طبعًا ما في اشي سهل بالطب
ولكن النظام أنظم وأرتب وأريح بكثير من السنة ونص الي قبل.
تبلشوا بالسيستمات من فصل ثاني سنة ثانية لحد ما تخلصوا ثالثة "يتخللهم صيفي سنة ثانية ما في ولا مادة تخصص كله متطلبات"، توخذوا فيهم سيستم كامل وبعدين تنتقلوا للي بعده وهكذا لحد ما تخلصوا الجسم كامل إن شاء الله
وهيك رسميًا صرتوا نص دكتور
انبسطتوا ع الجملة لما قرأتوها صح؟
فما بالكم لما توصلوها صحيح
سنة رابعة وخامسة وسادسة تبلشوا الآن كل الي درستوه بالبيسك تسقطوه على الواقع، وتتعلموا كيف تستخدموا وتسترجعوا المعلومات الي جمعتوها من دراسة البيسك بتشخيص المريض وكتابة الهستوري وغيرها.
احزروا وين وصلنا؟؟
صح، تخرجناا
وأخذنا شهادة طبيب عام MD .
ووصلنا مرحلة:
فلـنقـم كـلـنا لـلـدَّواء والـقلم
كلنا عطف على من يصارع السَّقم
ولنواصل المسير نحو غاية أهم
ونكون حقًا خير أمة بين الأمم
مفكرين إذا تخرجنا خلص وقفنا دراسة؟
لااا محصلش والله
بس نتخرج ننتقل لمرحلة الامتياز وهي عبارة عن سنة يداوم فيها الطبيب بأي مستشفى بده إياه وبس يخلصها يوخذ مزاولة مهنة ويصير طبيب رسميًا
بعد سنة الأمتياز يكون أمامك أكثر من طريق، إما الطريق الأكاديمي "تصير دكتور جامعي" أو السريري عن طريق إنك تتعين بالمستشفيات وتتدرب وتقدم امتحانات عشان تصير أخصائي، هاد بعد ما تقدم امتحان عشان تنقبل ببرنامج الإقامة بالتخصص الي بدك إياه.
اه اه حياتنا كلها امتحانات لا تستغرب
بالنهاية نحكيلكم نصيحة جوهرية ألا وهي "الشغف ما يطعمي خبز"، لازم تكون فاهم كمية الضغط الي بالتخصص مش عشان تبطل تدرسه أبدًا، بس عشان لما تدرسه تكون من البداية فاهم انت وين وشو مطلوب منك وتقدر بناء عليه إنك تقوم بدورك تجاه دراستك ومستقبلك بالشكل الصحيح
والنصيحة الثانية تعلموا تنظيم الوقت من اليوم عشان ما يكون الطب بالنسبة الكم مقبرة، وعشان تقدروا تمارسوا مواهبكم وتعملوا الأشياء الي بتحبوها بدون ما تهملوا دراستكم.
إذا كان في أي سؤال يجول في خواطركم فاحنا جاهزين للإجابة عنه، اكتبوا بالتعليقات
#التخصصات_الطبية
#أهل_الهمة
